រាជធានីភ្នំពេញ៖ ថ្ងៃទី៥ កុម្ភៈ ២០១០ ក្រសួងកសិកម្មរុក្ខាប្រមាញ់និងនេសាទ និងអង្គការស្បៀង និងកសិកម្មនៃសហប្រជា ជាតិបានចេញសេចក្ដីប្រកាសព័ត៌មានរួមគ្នាថា ការស្រាវជ្រាវទៅលើហ្វូងបក្សីនៅក្នុងភូមិប្រឡាយមាស ឃុំរមេញ ស្រុកកោះ អណ្ដែត ខេត្តតាកែវ ត្រូវបានរកឃើញជំងឺផ្ដាសាយបក្សី។ លទ្ធផលពីមន្ទីរពិសោធន៍នៃវិទ្យាស្ថានជាតិស្រាវជ្រាវបសុព្យាបាលលើវត្ថុ វិភាគចំនួន២០ រួមមានតំបាក្លូអាក់ តំបាបំពង់ខ្យល់ និងវត្ថុវិភាគចំនួន១០ពីសេរ៉ូមឈាមប្រមូលពីសត្វទាចំនួន១៣ក្បាល បានបង្ហាញពីលទ្ធផលវិជ្ជមាននៃវត្តមានមេរោគH5N1។
ដើម្បីត្រួតពិនិត្យការសាយភាយនៃជំងឺទៅភូមិជិតខាងនាយកដ្ឋានផលិតកម្ម និងបសុព្យាបាល ដោយរួមសហការជាមួយអង្គការស្បៀង និងកសិកម្មនៃសហប្រជាជាតិបានរៀបចំសម្លាប់បក្សីសរុបចំនួន១.២៦០ក្បាល (មាន់៥០០ក្បាល និងទា៧៦០ក្បាល) គិតត្រឹមថ្ងៃទី៤ ខែកុម្ភៈ ឆ្នាំ២០១០ ក្នុងភូមិប្រឡាយមាស ឃុំរមេញ ស្រុកកោះអណ្ដែត ខេត្ដតាកែវ និងតំបន់ជុំវិញក្នុងរង្វង់ដែលមានកាំប្រវែង១គីឡូម៉ែត្រ ដែលតំបន់នេះត្រូវបានប្រកាសថា ជាតំបន់ផ្ទុះជំងឺ។ តំបន់ដែលស្ថិតក្នុងរង្វង់ដែលមានកាំប្រវែង៥គីឡូម៉ែត្រ ត្រូវបានធ្វើចត្ដាឡីស័ក ហើយចរាចរបក្សីចេញចូល និងឆ្លងកាត់តំបន់នេះត្រូវបានហាមឃាត់។ ការចិញ្ចឹមបក្សីក៏ត្រូវបានហាមឃាត់ដែរ រហូតដល់ពេលមានប្រកាសជាថ្មី។ ភូមិដែលស្ថិតក្នុងរង្វង់កាំប្រវែង១០គីឡូម៉ែត្រ ត្រូវបានដាក់ឲ្យស្ថិតក្នុងការអង្កេតតាមដាន ហើយវត្ថុវិភាគសម្រាប់មន្ទីរពិសោធន៍ត្រូវបានប្រមូលដោយទៀងទាត់ ដើម្បីកំណត់ពីវត្តមានរបស់មេរោគ H5N1 តំបន់នេះ។
ភ្នាក់ងារ សុខភាពសត្វភូមិនៅភូមិប្រឡាយមាស ឃុំរមេញ ស្រុកកោះអណ្ដែត ខេត្ដតាកែវ បានរាយការណ៍នៅថ្ងៃទី២៦ ខែមករា ឆ្នាំ២០១០ ថា មានសត្វទាបានងាប់នៅក្នុងភូមិ។ ដោយយោងតាមការរាយការណ៍ខាងលើ វត្ថុវិភាគត្រូវបានយកហើយ បញ្ជូនទៅវិទ្យាស្ថានជាតិស្រាវជ្រាវបសុព្យាបាលដើម្បីធ្វើ រោគវិនិច្ឆ័យ។ នៅថ្ងៃទី២៩ ខែមករា ឆ្នាំ២០១០ វិទ្យាស្ថានជាតិស្រាវជ្រាវបសុព្យាបាលបានរកឃើញវត្តមានជំងឺផ្ដាសាយបក្សី ហើយបានបញ្ជូនវត្ថុវិភាគដដែលនោះទៅវិទ្យាស្ថានប៉ាស្ទ័រកម្ពុជា ដើម្បីបញ្ជាក់សាជាថ្មី ។ នៅថ្ងៃទី១ ខែកុម្ភៈ ឆ្នាំ ២០១០ វិទ្យាស្ថានប៉ាស្ទ័រកម្ពុជាក៏បានរកឃើញវត្តមានជំងឺផ្ដាសាយបក្សីនៅ ក្នុងវត្ថុ វិភាគចំនួន១០ផងដែរ ។ ក្រសួងកសិកម្មរុក្ខាប្រមាញ់ និងនេសាទបានចេញប្រកាស លេខ០៤០ប្រក.កសក ចុះថ្ងៃអង្គារទី២ ខែកុម្ភៈ ឆ្នាំ២០១០ ស្ដីអំពីការកំណត់តំបន់ជំងឺផ្ដាសាយបក្សីនិងវិធានការទប់ស្កាត់ ។
នៅក្នុងជំនួបជាមួយប្រជាជននៅថ្ងៃទី៣ ខែកុម្ភៈ ឆ្នាំ២០១០ ក្រសួងកសិកម្ម រុក្ខា ប្រមាញ់ និងនេសាទនាយកដ្ឋានផលិតកម្ម និងបសុព្យាបាលអភិបាលរងខេត្ដ ជាប្រធានគណៈកម្មការចម្រុះទប់ស្កាត់ជំងឺផ្ដាសាយបក្សី និងសមាជិកបានលើកទឹកចិត្ដដល់ប្រជាជនឲ្យរាយការណ៍ជាបន្ទាន់ពីករណី សង្ស័យលើបក្សីឈឺ ឬងាប់ទៅកាន់លេខទូរស័ព្ទទាន់ហេតុ ការណ៍លេខ ០១២ ៨៣៣ ៧៩៥,០១២ ២១៤ ៩៧០ ឬទៅកាន់មន្ត្រីផលិតកម្ម និងបសុព្យាបាលខេត្ដ ស្រុកមេភូមិ ឬភ្នាក់ងារសុខភាពសត្វភូមិដើម្បីចាត់វិធានការអង្កេតតាមដានជាបន្ទាន់ ។ ប្រជាជនក៏ត្រូវលើកទឹកចិត្ដឱ្យអនុវត្ដវិធានការការពារដើម្បីកុំឱ្យ មានការឆ្លងរីករាលដាលជំងឺទៅកន្លែងផ្សេងៗទៀត និងកុំឲ្យឆ្លងមកមនុស្ស៕
