ភ្នំពេញ៖ មន្ត្រីជំនាញនៃនាយកដ្ឋានប្រយុទ្ធប្រឆាំងជំងឺឆ្លងរបស់ក្រសួងសុខាភិបាល បានឲ្យដឹងថា ការឆ្លងរាលដាលជំងឺផ្ដាសាយ ប្រភេទថ្មី A/H1N1 ឡើងដល់៤៤៤ករណីហើយ ឯចំណែកអ្នកស្លាប់ដោយសារជំងឺនេះមានចំនួន៤នាក់ដដែល។
លោក សុខ ទូច ប្រធាននាយកដ្ឋានប្រយុទ្ធប្រឆាំងនឹងជំងឺឆ្លងនៃក្រសួងសុខាភិបាល បានប្រាប់សារព័ត៌មានមានដើមអម្ពិលតាមទូរស័ព្ទ កាលពីព្រឹកថ្ងៃទី ១៩ ខែវិច្ឆិកា ឆ្នាំ២០០៩ថា "អ្នកឆ្លងជំងឺផ្ដាសាយ A/H1N1 ឡើងដល់ ៤៤៤ករណី ដោយកាលពីសប្ដាហ៍មុនមានចំនួនអ្នកឆ្លង ៣៩៤នាក់"។
អង្គការសុខភាពពិភពលោកនឹងផ្ដល់វ៉ាក់សាំងចាក់ការពារជំងឺផ្ដាសាយប្រភេទថ្មី A/H1N1 មានចំនួន ៣០ម៉ឺនដូស
លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានប្រាប់ដើមអម្ពិលនៅឯសណ្ឋាគារកាំបូឌីយ៉ាណា កាលពីថ្ងៃទី១៩ ខែវិច្ឆិកា ឆ្នាំ២០០៩ថា "អង្គការសុខភាពពិភពលោកនឹងផ្ដល់វ៉ាក់សាំងចាក់ការពារជំងឺផ្ដាសាយ A/H1N1 ចំនួន៣០ ម៉ឺនដូសដល់កម្ពុជា"។ លោកបានបន្ថែមថា ក្រសួងសុខាភិបាលមានគោលការណ៍យកវ៉ាក់សាំងប្រភេទ A/H1N1 នេះទៅចាក់ជូនជាអាទិភាពដល់បុគ្គលិកសុខាភិបាល ដែលធ្វើការជាមួយអ្នកជំងឺប្រចាំថ្ងៃ ស្ត្រីមានផ្ទៃពោះដែលចាត់ទុកថា ជាអ្នកអាចរងគ្រោះធ្ងន់ធ្ងរនៅពេលដែលកើតជំងឺផ្ដាសាយប្រភេទថ្មីនេះ និងចាក់ជូនដល់កុមារពីអាយុ៦ខែ ដល់២ឆ្នាំ ពីព្រោះក្មេងនៅតូចងាយនឹងរងគ្រោះ។
លោក ម៉ម ប៊ុនហេង បានមានប្រសាសន៍ឲ្យដឹងទៀត "ចំពោះវ៉ាក់សាំង ៣០ម៉ឺនដូសនេះ យើងនឹងអាចចាក់ឲ្យកងកម្លាំងការពារសន្តិសុខជាតិ ដែលរស់នៅរួមគ្នានិងប្រជាជនមានជំងឺសួតរាំរ៉ៃដូចជាហឺតជាដើម"។ លោកបន្តថា វ៉ាក់សាំងចំនួន ៣០ម៉ឺនដូស គឺមិនគ្រប់គ្រាន់ទេសម្រាប់ប្រើប្រាស់នៅក្នុងប្រទេសកម្ពុជា។
លោកបានលើកឡើងឲ្យដឹងទៀតថា តំបន់ដែលអាទិភាពត្រូវផ្ដល់ឲ្យគឺនៅរាជធានីភ្នំពេញ ខេត្តកណ្ដាល កំពង់ស្ពឺ និងខេត្តសៀមរាប ដែលជាតំបន់ប៉ះពាល់ធ្ងន់ជាងគេ។ នៅពេលបច្ចុប្បន្ននេះក្រសួងសុខាភិបាលកំពុងរៀបចំផែនការដើម្បីធ្វើការបណ្ដុះបណ្ដាលដល់គ្រូពេទ្យក្នុងការចាក់វ៉ាក់សាំងផ្ដាសាយប្រភេទថ្មី A/H1N1 ជូនដល់ប្រជាពលរដ្ឋឲ្យបានត្រឹមត្រូវ។
ទាក់ទងទៅនឹងវ៉ាក់សាំង A/H1N1 នេះលោកសុខ ទូច បានមានប្រសាសន៍ឲ្យដឹងថា វ៉ាក់សាំងនេះនាំចូលដោយអង្គការសុខភាពពិភពលោក ដែលអង្គការទទួលបានពីប្រទេសអភិវឌ្ឍន៍សម្រាប់ផ្ដល់ឲ្យប្រទេសក្រីក្រ ដែលគ្មានលទ្ធភាពទិញ។ លោកបន្ថែមថា នៅលើពិភពលោកមានប្រទេសចំនួន៩៥ ក្នុងនោះរួមមានប្រទេសកម្ពុជាផងដែរ ត្រូវបានគេចាត់ទុកជាប្រទេសក្រីក្រ ដែលពុំមានលទ្ធភាពទិញវ៉ាក់សាំង A/H1N1 នេះទេ។
លោក សុខ ទូច បានបញ្ជាក់ឲ្យដឹងទៀតថា "វ៉ាក់សាំងប្រភេទនេះនឹងមកដល់កម្ពុជានៅចុងខែវិច្ឆិកា ឬដើមខែធ្នូ ឆ្នាំ២០០៩ មានចំនួន៣០ម៉ឺនដូស ដែលអង្គការសុខភាពពិភពលោកផ្ដល់ឲ្យជាជំហានដំបូង"៕
