* ស្ត្រីខ្មែរយកប្ដីបុរសតៃវ៉ាន់ ២.៥០០នាក់មិនទាន់ទទួលបានសញ្ជាតិតៃវ៉ាន់
ស្ត្រីខ្មែររៀបការជាមួយបុរសតៃវ៉ាន់ តវ៉ាមុខក្រសួងការបរទេសតៃវ៉ាន់ ក្នុងក្រុងតៃប៉ិ កាលពីខែមីនាឆ្នាំ២០០៧ សុំឲ្យផ្ដល់សញ្ជាតិដល់ពួកគេ (រូបថតកាសែតតៃប៉ិថែម)ភ្នំពេញ៖ កាលពីជាង១០ឆ្នាំមុន សំណាង បានសម្រេចចិត្តថានឹងត្រូវរំដោះខ្លួនពីការងារស៊ីឈ្នួលដកស្ទូង និងច្រូតស្រូវឲ្យគេនៅក្រោមកម្ដៅថ្ងៃក្ដៅដ៏សែនលំបាក នៅឃុំស្ដៅ ស្រុកកងមាស ខេត្តកំពង់ចាម ដោយរំពឹងថា នឹងមានជីវភាពធូរធារ នៅពេលដែលមេខ្យល់ម្នាក់ណែនាំឲ្យរៀបការជាមួយបុរសជនជាតិតៃវ៉ាន់ ដែលគេប្រាប់ថា ជាអ្នកមានស្ដុកស្ដម្ភម្នាក់។
សំណាងសង្ឃឹមថា ក្រោយពីរៀបការ នាងនឹងបានប្រាក់ជួយផ្គត់ផ្គង់ជីវភាពឪពុកម្ដាយចាស់ជរារបស់នាងពេលដែលនាងទៅរស់នៅកោះតៃវ៉ាន់។ ប៉ុន្តែសេចក្ដីសង្ឃឹមទាំងប៉ុន្មានត្រូវរលាយសាបសូន្យ ដោយទីបំផុត សំណាង បានក្លាយជាអ្នកធ្វើការរកលុយដើម្បីផ្គត់ផ្គង់ជីវភាពគ្រួសារខាងប្ដីនៅតៃវ៉ាន់ទៅវិញ។
ទោះបីជាយ៉ាងណា សំណាងមិនមែនជានារីខ្មែរតែម្នាក់ដែលក្លាយខ្លួនជាជនរងគ្រោះ ដោយការរៀបការឆ្លងដែនជាមួយជនជាតិតៃវ៉ាន់ និងកូរ៉េនោះឡើយ។
តាមរយៈការស្រាវជ្រាវជាច្រើនបង្ហាញថា ស្ត្រីខ្មែរដែលរៀបការជាមួយបុរសជនជាតិតៃវ៉ាន់ និងកូរ៉េត្រូវបានគេកេងប្រវ័ញ្ចកម្លាំងពលកម្ម និងជួញដូរផ្លូវភេទ ដែលជាអំពើខុសច្បាប់កើតឡើងជាប្រព័ន្ធ។
សម្ដេចនាយករដ្ឋមន្ត្រីហ៊ុន សែន បានមានប្រតិកម្ម កាលពីខែមីនាឆ្នាំ២០០៨ថា "ពីមុនមានការឆបោកកុមារនៅជនបទមកទីក្រុង ដើម្បីធ្វើការងារ តែពួកគេក្លាយជាជនរងគ្រោះ។ ឥឡូវមានការបោកប្រាស់មួយប្រភេទទៀត តាមរបៀបរៀបអាពាហ៍ពិពាហ៍ទៅក្រៅប្រទេស។
សំណាង ជាឈ្មោះស្ត្រីខ្មែរម្នាក់ដែលអ្នកកាសែតដាក់ឲ្យដើម្បីការពារកិត្តិយស និងសុវត្ថិភាពរបស់នាង បានផ្ដល់បទសម្ភាសន៍តាមទូរស័ព្ទពីកោះតៃវ៉ាន់ កាលពីថ្ងៃទី២៣ខែធ្នូឆ្នាំ២០០៩។ នាងបានរៀបរាប់ពីជីវិតរបស់នាងពេលដែលរៀបការហើយទៅរស់នៅជាមួយប្ដីនៅតៃវ៉ាន់។
សំណាង បានរៀបរាប់ថា កាលពីជាង១០ឆ្នាំមុន នាងបានរៀបការជាមួយបុរសជនជាតិតៃវ៉ាន់ម្នាក់អាយុ៤២ឆ្នាំ ដែលជាបុរសពោះម៉ាយមានកូនពីរនាក់ នៅភោជនីយដ្ឋានមួយនៅព្រែកលៀប តាមការរៀបចំរបស់មេខ្យល់។ ក្រោយពេលរៀបការបានរយៈពេលមួយសប្ដាហ៍ នាងបានជិះយន្តហោះជាលើកដំបូងក្នុងជីវិតរបស់នាង និងពោរពេញដោយក្ដីសង្ឃឹមចេញពីប្រទេសកម្ពុជាទៅរស់នៅជាមួយប្ដីនៅកោះតៃវ៉ាន់។
នាងនិយាយថា "មុនដំបូងខ្ញុំគិតថា ខ្ញុំមានសំណាងជាងគេក្នុងចំណោមស្ត្រីរស់នៅភូមិស្រុកជាមួយគ្នា"។ សំណាងនិយាយបន្តថា រយៈពេលមួយឆ្នាំដំបូងដែលរស់នៅតៃវ៉ាន់នាងឧស្សាហ៍ផ្ញើប្រាក់ពីតៃវ៉ាន់ឲ្យឪពុកម្ដាយជាញឹកញាប់រហូតសង់ផ្ទះថ្មីបាន។
ចាប់តាំងពីនាងទៅរស់នៅតៃវ៉ាន់ សំណាងនិយាយថា ជាញឹកញាប់នាងតែងតែទទូចចង់បានកូន ប៉ុន្តែប្ដីរបស់នាងតែបដិសេធមិនឲ្យនាងទុកកូន ដោយរកមូលហេតុផ្សេង។ ក្រោយមកទើបនាងដឹងថា មូលហេតុដែលប្ដីរបស់នាងមិនឲ្យនាងមានកូន ដោយសារនៅពេលដែលប្ដីរបស់នាង បានបង្ខំឲ្យនាងទៅធ្វើការនៅរោងចក្រដើម្បីយកប្រាក់ផ្គត់ផ្គង់គ្រួសារខាងប្ដីដែលមានសមាជិក៥នាក់។
ទោះបីជានាងបានរស់នៅកោះតៃវ៉ាន់រយៈពេលជាងដប់ឆ្នាំហើយក៏ដោយ នាងនិយាយថា រហូតមកដល់ពេលនេះ នាងពុំទាន់ទទួលបានសញ្ជាតិតៃវ៉ាន់នៅឡើយ ដោយសារតែប្ដីរបស់នាងមិនព្រមឲ្យនាងចុះឈ្មោះចូលសញ្ជាតិ ព្រោះខ្លាចពេលដែលនាងបានទទួលសញ្ជាតិហើយ នាងរត់ចេញពីផ្ទះអត់មានអ្នកណារកលុយចិញ្ចឹមគ្រួសារនៅតៃវ៉ាន់។
រឿងរ៉ាវរបស់សំណាងមិនមែនគ្រាន់តែធ្វើឲ្យខ្លួននាងស្ដាយក្រោយប៉ុណ្ណោះទេ សូម្បីតែគ្រួសាររបស់នាងនៅស្រុកខ្មែរ ក៏មានវិប្បដិសារីដែរ។
ម្ដាយរបស់នាងអាយុ៦០ឆ្នាំដែលរស់នៅឃុំស្ដៅ បាននិយាយថា គាត់បានដឹងពីការលំបាករបស់កូនគាត់ដែលរស់នៅតៃវ៉ាន់ ហើយមានការអាណិតកូនស្រីរបស់គាត់ជាខ្លាំង។
អ្នកស្រីបានរំលឹករឿងកន្លងមកថា គ្រួសាររបស់គាត់មានជីវភាពខ្វះខាត ដោយសារមិនមានដីស្រែធ្វើនឹងគេ ហើយគាប់ជួនមានមេខ្យល់មកបញ្ចុះបញ្ចូលឲ្យកូនស្រីរបស់គាត់យកប្ដីជនជាតិតៃវ៉ាន់ គាត់ក៏យល់ព្រម ដោយរំពឹងថា នឹងជួយឲ្យគាត់មានជីវភាពធូរធារ។ ប៉ុន្តែនេះជាការយល់ខុសដូចជាកូនរបស់គាត់ដែរ។
ក្រៅពីសំណាង នៅមាននារីខ្មែរជាច្រើននាក់ទៀតដែលត្រូវរស់រងទុក្ខវេទនា ធ្វើការតាមរោងចក្ររកលុយចិញ្ចឹមគ្រួសារខាងប្ដីជនជាតិតៃវ៉ាន់នោះ។ ហើយមានស្ត្រីខ្មែរជាច្រើនទៀតកំពុងតែត្រូវទទួលរងការកេងប្រវ័ញ្ចទាំងកម្លាំងពលកម្ម និងការកេងប្រវ័ញ្ចផ្លូវភេទ។
អ្នកស្រី ឡុង ស៊ីថា អាយុ៥៥ឆ្នាំដែលរស់នៅក្នុងឃុំស្ដៅដែរ ហើយបានឲ្យកូនរបស់គាត់រៀបការជាមួយបុរសជនជាតិតៃវ៉ាន់ដែរនោះ បាននិយាយថា គាត់សប្បាយចិត្តខ្លាំងណាស់ពេលឃើញកូនរៀបការជាមួយប្ដីចិនតៃវ៉ាន់នោះ បើទោះជាពិធីការនោះមិនមានលក្ខណៈធំដុំ និងបានទទួលថ្លៃទឹកដោះត្រឹមតែ៣០០ដុល្លារអាមេរិកក៏ដោយ។ អ្នកស្រីនិយាយថា គាត់គិតថា កូនរបស់គាត់មានសំណាងបានប្ដីទៅរស់ស្រុកគេ ដោយគាត់តែងនិយាយអួតប្រាប់អ្នកជិតខាង។ ប៉ុន្តែឥឡូវគាត់គ្មានពាក្យអ្វីនិយាយទៀតទេ ក្រៅតែពីអាណិតកូន។
អ្នកស្រី ឡុង ស៊ីថា និយាយថា "កូនប្រសាខ្ញុំមានស្រីថ្មី ហើយគេចាត់ទុកកូនស្រីរបស់ខ្ញុំដូចជាអ្នកបម្រើនៅក្នុងផ្ទះតែប៉ុណ្ណោះ"។
- ស្ត្រីខ្មែរយកប្ដីបុរសតៃវ៉ាន់២.៥០០នាក់មិនទាន់ទទួលបានសញ្ជាតិតៃវ៉ាន់
យោងតាមវ៉ិបសាយ តៃប៉ិថែម (TAIPEI TIMES) បានឲ្យដឹងថា កាលពីខែមីនាឆ្នាំ២០០៧ ស្ត្រីខ្មែរមួយក្រុមដែលបានរៀបការជាមួយបុរសតៃវ៉ាន់បានជួបជុំគ្នាតវ៉ានៅមុខក្រសួងការបរទេសតៃវ៉ាន់ក្នុងទីក្រុងតៃប៉ិដោយតវ៉ាជាមួយក្រសួងការបរទេសតៃវ៉ាន់ថា បានរារាំងមិនឲ្យពួកគេទទួលសញ្ជាតិតៃវ៉ាន់។
តៃប៉ិ ថែមបានឲ្យដឹងថា ស្ត្រីខ្មែរប្រមាណ ២.៨០០នាក់នៅឆ្នាំ២០០៧ដែលបានរៀបការជាមួយបុរសតៃវ៉ាន់ជាច្រើនឆ្នាំមកហើយ នៅមិនទាន់ទទួលបានសញ្ជាតិជាតៃវ៉ាន់នៅឡើយ។
យោងតាមច្បាប់សញ្ជាតិរបស់តៃវ៉ាន់តម្រូវជនជាតិបរទេសអាចស្នើសុំចូលសញ្ជាតិតៃវ៉ាន់បាន លុះត្រាមានការបញ្ជាក់ទទួលស្គាល់សញ្ជាតិពីប្រទេសដើមរបស់ខ្លួនជាមុនសិន។
តៃប៉ិ ថែម បានដកស្រង់សម្ដីស្ត្រីអ្នកនាំពាក្យរងក្រសួងការបរទេសតៃវ៉ាន់ថា ស្ត្រីកម្ពុជាភាគច្រើនដែលដាក់ពាក្យស្នើចូលសញ្ជាតិតៃវ៉ាន់នោះ គឺភាគច្រើនប្រើសំបុត្រអាពាហ៍ពិពាហ៍ក្លែងក្លាយ។
លោកស្រី ជូ ប៊ុនអេង អនុរដ្ឋលេខាធិការក្រសួងមហាផ្ទៃ មានប្រសាសន៍ថា តាមគោលការណ៍របស់រដ្ឋាភិបាល អាជ្ញាធរកម្ពុជាមិនអាចចេញសំបុត្រអាពាហ៍ពិពាហ៍ដល់ស្ត្រីដែលរៀបការជាមួយបុរសតៃវ៉ាន់បានទេ។ លើសពីនេះទៅទៀត អាជ្ញាធរកម្ពុជាមិនអាចអន្តរាគមន៍ជួយស្ត្រីខ្មែរដែលរៀបការជាមួយបុរសតៃវ៉ាន់បានទេ។
លោកស្រី ជូ ប៊ុនអេង មានប្រសាសន៍ទៀតថា កន្លងមកអាជ្ញាធរកម្ពុជាអាចជួយស្ត្រីខ្មែរទាំងនោះដោយប្រយោល ដោយគាំទ្រអង្គការក្រៅរដ្ឋាភិបាលនានាដែលធ្វើសកម្មភាពជួយស្ត្រីខ្មែរនៅប្រទេសតៃវ៉ាន់នេះ។
លោកស្រី ជូ ប៊ុនអេង មានប្រសាសន៍ទៀតថា កន្លងមកអាជ្ញាធរកម្ពុជាបានស្នើសុំអាជ្ញាធរប្រទេសចិនតាមរយៈស្ថានទូតចិននៅកម្ពុជាឲ្យជួយស្ត្រីខ្មែរដែលកំពុងរស់នៅលើកោះតៃវ៉ាន់ ហើយស្ថានទូតចិនក៏បានសន្យាថានឹងជួយស្ត្រីខ្មែរទាំងនោះដែរ។
ទីភ្នាក់ងារ អេភី បានដកស្រង់របាយការណ៍របស់មជ្ឈមណ្ឌលជួយស្ត្រីមានវិបត្តិតាមរយៈបេសកកម្មស្វែងរកការពិតមួយកាលពីឆ្នាំ២០០៦បានឲ្យដឹងថា មានស្ត្រីកម្ពុជាប្រមាណ៥២១៩នាក់កំពុងរស់កោះតៃវ៉ាន់។
អ្នកយកព័ត៌មានមិនសុំសេចក្ដីបញ្ជាក់ពីមជ្ឈមណ្ឌលជួយស្ត្រីមានវិបត្តិនៅភ្នំពេញបាននៅឡើយ ដោយអ្នកទទួលទូរស័ព្ទរបស់មជ្ឈមណ្ឌលនេះសូមឲ្យអ្នកយកព័ត៌មានដាក់ពាក្យស្នើសុំជាមុន។
លោកស្រី លឹម មុនី ប្រធានកម្មវិធីស្ត្រីនៃសមាគមអាដហុក មានប្រសាសន៍ថា កន្លងមកមានគណៈប្រតិភូស្ត្រីកម្ពុជានៃអង្គការក្រៅរដ្ឋាភិបាលបានទៅធ្វើទស្សនកិច្ចនៅកោះតៃវ៉ាន់ហើយបានជួបជាមួយលោកប្រធានាធិបតីកោះតៃវ៉ាន់។
លោកស្រី លឹម មុនី មានប្រសាសន៍ទៀតថា ក្នុងជំនួបនោះ លោកប្រធានាធិបតីកោះតៃវ៉ាន់បានទទួលស្គាល់ថា ស្ត្រីខ្មែរដែលរៀបការជាមួយបុរសតៃវ៉ាន់ចំនួន២.៥០០នាក់ ក្នុងចំណោមស្ត្រីខ្មែរជាង៥.០០០នាក់នៅមិនទាន់ទទួលឲ្យចូលសញ្ជាតិតៃវ៉ាន់នៅឡើយ។
លោកស្រី លឹម មុនី បានមានប្រសាសន៍ថា ប្រធានាធិបតីកោះតៃវ៉ាន់បានសន្យាថា នឹងរកដំណោះស្រាយដើម្បីឲ្យស្ត្រីខ្មែរទាំងនោះ។
សម្រាប់សំណាងទោះបីជាមានការសន្យាពីប្រធានាធិបតីតៃវ៉ាន់ តៃវ៉ាន់ក្នុងការជួយឲ្យស្ត្រីខ្មែរប្រមាណ២.៥០០នាក់ទទួលបានសញ្ជាតិតៃវ៉ាន់ក៏ដោយ ក៏នាងមិនងាយនឹងទទួលបានទេ ដោយសារសូម្បីតែនាងចង់ទៅដាក់ស្នើសុំសញ្ជាតិតៃវ៉ាន់នោះ ក៏ប្ដីរបស់នាងមិនយល់ព្រមផង។
ទោះបីយ៉ាងណា អ្វីដែលសំណាងអាចធ្វើបានគឺរស់តាមយថាកម្មនៅកោះតៃវ៉ាន់ម្នាក់ ដោយធ្វើការដើម្បីយកប្រាក់មកផ្គត់ផ្គង់គ្រួសារប្ដីរបស់នាងបន្តទៅទៀត។
សំណាងនិយាយដោយអួលដើមកថា "ខ្ញុំមានតែតស៊ូរស់នៅតាមយថាកម្មទៅចុះក្រែងសន្សំលុយបានបន្តិចបន្តួចផ្ញើទៅឲ្យឪពុកម្ដាយនៅស្រុកខ្មែរដែលគាត់ចាស់ទៅហើយ"។
លើសពីនេះទៅទៀតនោះអ្វីដែលសំណាងសោកស្ដាយនោះគឺមនុស្សប្រុសម្នាក់នៅស្រុកជាមួយគ្នាដែលសុំស្រឡាញ់ និងចង់រៀបការជាមួយនាង ប៉ុន្តែបែរជាមិនបានជួបគ្នាទៅវិញ។
សំណាង និយាយដោយដកដង្ហើមធំថា "បើមានជាតិក្រោយទៀត ខ្ញុំចង់រៀបការជាមួយជនជាតិខ្មែរគ្នាឯងវិញ"៕
